КАНЦЭРТ ДУХАВОГА АРКЕСТРА
“КЛАСІКА+ДЖАЗ”
21 снежня 2018 года канцэртная зала Маладзечанскага дзяржаўнага музычнага каледжа імя М.К. Агінскага напоўнілася гукамі джазавай музыкі. Разам з духавым аркестрам альма-матэр гледачы выправіліся ў незвычайнае падарожжа па хвалях свінга, імправізацыі і экспрэсіі.
Распачаўся канцэрт традыцыйным джазавым творам Джорджа Гершвіна, але так як назва сустрэчы была заяўлена “Класіка+джаз”, то не абышлося і без сюрпрызаў.
У выкананні духавога аркестра пад кіраўніцтвам маладога таленавітага дырыжора Аляксея Андрэева прагучала серыя класічных твораў, з якімі выканаўцы крыху паімправізавалі, дапоўнілі асноўную тэму новымі матывамі і пагулялі з фактурай.
Такім чынам гледачы пачулі творы А. Хачатурана, А. Барадзіна, П. Чайкоўскага, М. Рымскага-Корсакава і нават В.Моцарта ў новым джазавым гучанні.
Пад гукі трубы і саксафона госці вечара перамясціліся на амерыканскі кантынент, дзе іх увазе былі прадстаўлены музычныя шэдэўры кінематографа. “Чаттануга чу-чу” і “Take the train A” – гэта толькі частка таго, што выканалі маладыя джазмэны.
У завяршэнні канцэрта прагучаў праўдзіва джазавы твор, які стаў пачатковай кропкай лацінаамерыканскага джаза - “Караван” Дз.Элінгтана.
Аматарам джаза застаецца сказаць толькі тое, што ўжо ў 1-й палове 2019 года іх чакаюць новыя падарункі ад духавога аркестра нашай навучальнай установы.
Аўтар артыкула: А. КАРОЛІК
Фота: І. ШАБУНЕВIЧ